(ԱԶԱՏ ՕՐ, 2 Յունիս) Հայաստանի անկախութեան 98ամեակին տօնակատարութիւնը իր լաւագոյն դրսեւորումը գտաւ Թեսաղոնիկէի Հ.Յ.Դ. Երիտասարդական Միութեան «Սողոմոն Թեհլիրեան» խումբի կազմակերպութեամբ պատրաստուած ձեռնարկով, որ ամբողջօրեայ արշաւ մըն էր դէպի Խալքիտիքիի Ամարանոցը, Կիրակի՝ 29 Մայիս 2016ին։
Երիտասարդական խանդով ու կենսունակութեամբ, ընկերային բացառիկ խանդավառ մթնոլորտի մէջ, տեղի ունեցաւ Հայաստանի Հանրապետութեան անկախութեան նուիրուած ձեռնարկը, որ համախմբած էր Թեսաղոնիկէէն երեք փուլմաններով եւ անձնական ինքնաշարժներով հասած ժողովուրդը։
Խալքիտիքիի գեղեցիկ ամարանոցի վայրին նախապատրաստութիւնը արդէն երկու օրէ ի վեր կատարած էին Երիտասարդական Միութեան անդամները, որոնք խնամքով մաքրած ու կարգի դրած էին ձմրան ընթացքին փակ մնացած բանակավայրը։ alt
Հայաստանի Հանրապետութեան հռչակման եւ Մայիսեան Հերոսամարտներու 98ամեակին նուիրուած ձեռնարկին ներկայ եղան Թեսաղոնիկէի հոգեւոր հովիւ Սմբատ Վրդ. Սապունճեան, Յունահայոց Ազգային Վարչութեան անդամուհի տիկին Վերա Պլէճեան, Թեսաղոնիկէի Թաղային Խորհուրդի ատենապետ պրն. Վարդգէս Գունտաքճեան եւ անդամները, Հ.Յ.Դ. Յունաստանի Կեդրոնական Կոմիտէի անդամ ընկ. Պետրոս Հալաճեան, Հ.Յ.Դ. Թեսաղոնիկէի «Յակոբ Գասապեան» Կոմիտէի ներկայացուցիչ ընկ. Կարօ Նատեան եւ Կոմիտէի անդամները, Հ. Գթ. Խաչի Շրջանային Վարչութեան ատենապետուհի ընկ. Նուէր Տէրէյեան եւ անդամուհիները, Համազգայինի «Ղազարոս Սարեան» մասնաճիւղի վարչական ընկերները, Հ.Յ.Դ. Թեսաղոնիկէի Երիտասարդական ու Պատանեկան Միութեան անդամները եւ Ծաղկոց շաբաթօրեայ վարժարանի տնօրէնութիւնն ու ուսուցչական կազմը եւ աշակերտութիւնը։
Ոգեշնչող ու հարազատ մթնոլորտի մէջ, հանդիսութեան բացումը կատարեց Երիտասարդականի անդամ ընկ. Խաչիկ Մարուքեան, որ ողջունեց մեր ազգային անկախ պետականութեան ծնունդը եւ անդրադարձաւ հայ ազգի ապագային կապուած հետագայ պահերուն։
Ապա՝ Թեսաղոնիկէի հոգեւոր հովիւ Սմբատ Վրդ. Սապունճեան խօսեցաւ Մայիսեան փառահեղ յաղթանակներու մասին՝ շեշտելով Մայիս 28ի նշանակութիւնը հայ ժողովուրդի ազատագրական պայքարին մէջ։ Ան ըսաւ, որ Մայիս 28ը շրջադարձային նշանակութիւն ունեցաւ հայ ազգի նորագոյն պատմութեան մէջ, որով հայութիւնը վերահաստատեց ազատ ապրելու իր իրաւունքը՝ խորապէս գիտակցելով, որ ազգին հիմքը ազատ, անկախ եւ հզօր պետականութիւնն է։
Հայր Սուրբը յորդորեց երիտասարդութիւնն ու ներկայ ժողովուրդը ամրապնդուելու անկախութեան խորհուրդով, յանուն հայրենիքի եւ Արցախի պաշտպանութեան ի գործ դրուած պայքարներով։ Ան անդրադարձաւ Արցախի ի նպաստ վերջերս կազմակերպուած ֆոնեթոն-դրամահաւաքին՝ ողջունելով մեր հայրենակիցներու պատրաստակամութիւնը եւ մասնակից դառնալու դրական տրամադրութիւնը։
Յաջորդաբար խօսք առաւ Թեսաղոնիկէի Թաղային Խորհուրդի ատենապետ պրն. Վարդգէս Գունտաքճեան, որ ուրախութիւն յայտնեց Ամարանոցի մէջ տօնահանդէսը կազմակերպելու գեղեցիկ գաղափարին գծով եւ մեծապէս գնահատեց Երիտասարդականի ու Համազգայինի համագործակցութեամբ պատրաստուած ձեռնարկը։ Պրն. ատենապետը խօսեցաւ Ամարանոցի երկարամեայ գործունէութեան մասին, որ ոչ միայն յունահայ, այլ նաեւ օտար երկիրներէ ժամանած իրերայաջորդ երիտասարդ սերունդներ հիւրասիրած, հայօրէն դաստիարակած ու հայութեամբ ներշնչած է։
Օրուան բանախօսն էր Հ.Յ.Դ. Յունաստանի Հայ Դատի Յանձնախումբի անդամ ընկ. Հռիփսիմէ Յարութիւնեան, որ յատկապէս հրաւիրուած էր ձեռնարկին համար։ Հիւր դասախօսը անդրադարձաւ ազգային-ազատագրական պայքարի ծնունդին ու Մայիս 28ի նշանակութեան՝ շեշտելով, թէ Մայիս 28ը այն թուականն է, որ կը խորհրդանշէ հայ ժողովուրդին ազատութեան տենչը եւ իր անկախութիւնը պաշտպանելու հաւաքական կամքը։
Քննարկելով անկախութեան առաջին շրջանի պայմաններն ու ձեռքբերումները՝ ան խօսեցաւ պետական կառոյցի ձեւաւորման, հայ քաղաքական մտքի զարգացման եւ հայութիւնը միախմբող սկզբունքային նպատակին մասին։ Շեշտեց ու կեդրոնացաւ հայ մարդը, դաշնակցական երիտասարդը եւ մեր հայրենիքը յուզող հարցերուն, հրամայականներուն եւ հայ ինքնութիւնը յատկանշող ազդակներուն վրայ։ Թուեց Հայ Դատի պահանջատիրական գործունէութեան մէջ առաջնահերթութեանց ու հետագայ մարտահրաւէրներու շարքը։
Ապա՝ բանախօսը անդրադարձաւ Արցախեան վերջին իրադարձութիւններուն եւ Ատրպէյճանի յարձակումով ստեղծուած իրավիճակին՝ շեշտելով, թէ պատերազմի մէջ յաղթած ժողովուրդը իր պայքարը կը շարունակէ՝ անպարտ մնալու համար նո՛յնպէս քաղաքական, քարոզչական ու դիւանագիտական ճակատներուն վրայ։
Ձեռնարկի վերջին խօսքը վերապահուած էր Հայ Գթութեան Խաչի Շրջանային Վարչութեան ատենապետուհի ընկ. Նուէր Տէրէյեանին, որ ողջունեց ներկաները եւ շնորհաւորեց Մայիսեան անկախութեան տօնը, մեծ ոգեւորութեամբ խօսելով Խալքիտիքիի Ամարանոցի երկարամեայ դաստիարակիչ գործունէութեան մասին։ Ան նշեց, թէ երկու շարունակական տարիներէ ի վեր ստիպուած փակ կը մնայ ամառնային բանակումի շրջանը, այսուհանդերձ մեծ ճիգ կը կատարուի, որպէսզի շուտով լուծուին առկայ խնդիրները եւ Ամարանոցը կարողանայ շարունակել իր ազգային ստեղծագործ կեանքը։
Կէսօրուան համեղ խորովածէն, լաւաշ հացերով եւ աղցաններով լեցուն ճոխ սեղաններէն ու անուշեղէններու սպասարկումէն ետք, ժամը եկած էր գեղարուեստական յայտագրին, զոր ներկայացուց Համազգայինի «Մասիս» պարախումբը, պարուսուցութեամբ պրն. Յովիկ Թովմասեանի։
Հայկական քոչարին ու ազգագրական գեղեցիկ պարերը ներկայացուեցան պարախումբի երկսեռ անդամներուն կողմէ՝ մեծ խանդավառութիւն եւ ոգեւորիչ մթնոլորտ ստեղծելով ներկաներուն մօտ։
Իր քաղցր ձայնով եւ արհեստավարժ մեկնաբանութեամբ՝ օր. Մէրի Սփիրիտոնիտու մեներգեց «Կիլիկիան», «Պինկէօլ»ը, «Ով սիրուն սիրուն» եւ այլ երգեր, խլելով ներկաներու ծափահարութիւնները։
Հանդիսութեան պաշտօնական մասը իր աւարտին հասաւ Հ.Յ.Դ. Երիտասարդական Միութեան «Սողոմոն Թեհլիրեան» խումբի ատենապետ ընկ. Արտաւազդ Սիմոնեանի կողմէ Երիտասարդականի գործունէութեան շուրջ փոխանցուած մանրամասն տեղեկութիւններով։ Պաստառի վրայ նկարներու եւ վիտէօներու ցուցադրութիւն տեղի ունեցաւ, Երիտասարդականի աշխատանքներու հիմնական բաժիններէն։
Պաշտօնական բաժինը կրնար աւարտած ըլլալ, այսուհանդերձ՝ նուազ հետաքրքրական չէր անպաշտօն մասը, բանակավայրի դաշտերէն ներս պատանիներու գնդակի խաղերով, մեծերու միջեւ զրոյցներով, անտառային ծառախիտ շրջանէն ներս պտոյտներով եւ նոյնիսկ ծովու լոգանքով։
Լիցքաւորուած ու վերաթարմացած մթնոլորտի մէջ, իր աւարտին հասաւ ամբողջօրեայ այս գեղեցիկ տօնահանդէսը, ուր շեշտը դրուեցաւ մեր միասնական ուժին, հայութեան արդար պայքարներուն ի սպաս ցուցաբերուած մեր պատրաստակամութեան ու մեր ճիգերու ուժեղացման վրայ։
Գիտակից ու ազգային ծառայութեան նուիրուած պատրաստակամ հայ երիտասարդութեան ճիգը տեսնելով՝ յստակ է, թէ մեր ազգային կեանքը կը վերանորոգուի ու կը վերաթարմանայ, ի խնդիր նոր նուաճումներու եւ յաջողութիւններու։
Անոնք են ապագայի մեր երաշխիքը։
Ինչպէս եւ մեր բոլորին հպարտանքը։
Թղթակից
Լուսանկար – Հռիփսիմէ Յարութիւնեան