(yerkir.am) ՀՅԴ Բյուրոյի Հայ Դատի և քաղաքական հարցերի գրասենյակի պատասխանատու Կիրո Մանոյանի կարծիքով` ՀՀ նախագահը ճիշտ արեց, երբ արագ լուսաբանեց հանդիպման մանրամասնությունները /Վիեննայից վերադառնալիս նախագահի հարցազրույցը` ինքնաթիռում -խմբ./, որովհետև այդ կերպ առնվազն մեր հասարակության համար որոշ խնդիրներ պարզ դարձան:
«Երբ համանախագահողների հայտարարությունն էլ համահունչ էր մեր նախագահի ասածներին, արդեն ցույց տվեց, որ իրականում ինչ ձևով են ընթացել այդ բանակցությունները: Ադրբեջանի կողմից լռությունը խոսում է այն մասին, որ նրանք այդքան էլ խանդավառ չեն այդ հանդիպմամբ, և համանախագահները փորձում են սիրաշահել Ադրբեջանին ու սեղանի շուրջ պահել` փորձելով նաև ասել բաներ, որոնք Ադրբեջանի ցանկությունն է: Հայկական կողմը փուլային բանակցություններին դեմ չէ, եթե փուլայինի ընթացքում ճանաչվի ԼՂՀ անկախությունը և այլն, բայց այդպես չէ հարցը. այս առաջարկների շուրջ փուլայինը իսկապես պետք է անընդունելի լինի: Իսկ եթե դա մի կողմ դնենք և նայենք, որ սա իրականում փաթեթային լուծում է, և կիրառումը պետք է լիներ փուլային, այդ դեպքում նույնպես անընդունելի կետեր կան: Օրինակ` երբ ասում են ազատագրված տարածքներ, արդեն անընդունելի է, որովհետև ամբողջ Արցախն է ազատագրված»,- ասաց Մանոյանը:
Ըստ նրա` չի կարելի անհավասար փոխզիջումներ անել, որովհետև եթե փոխզիջման խնդիր է, պետք է համահավասար լինի:
Մանոյանը նշեց նաև, որ, առանց ԼՂՀ մասնակցության, ակնկալել, որ ինչ-որ արդյունք պետք է լինի, ճիշտ չէ:
Խոսելով Վիեննայում ձեռք բերված` հետաքննական մեխանիզմների տեղադրման մասին` նա ասաց. «Հետաքննական մեխանիզմները պետք է հստած ճշտվեն, մինչև հիմա ճշտված չեն: Կողմերը պետք է պայմանավորեն, թե ինչ կոնկրետ հետաքննական մեխանիզմներ են լինելու: Վերջերս ուսումնասիրել եմ դիտորդական նման առաքելությունների առօրյա զեկույցները Ուկրաինայի դեպքում և հասկացել, որ հասցեականացված են այնքանով, որ ասում են` այս կողմից կրակ եկավ, բայց որակումներ չեն տալիս: Ակնկալել, որ պետք է դատավորի նման հայտատարեն` դու մեղավոր ես, և մենք պետք է գնդակահարենք բոլորին, այդպիսի բան չի լինի»:
Մանոյանը նշեց նաև, որ պետք է պարզել` հետաքննական մեխանիզմները կոնկրետ ինչ են` մարդի՞կ, թե՞ սարքեր:
Ադրբեջանի լռությունն այն մասին է խոսում, որ իրենք այդքան էլ խանդավառ չեն Վիեննայի հանդիպմամբ. Կիրո Մանոյան
(tert.am) ՀՅԴ Հայ դատի և քաղաքական հարցերի գրասենյակի պատասխանատու Կիրո Մանոյանն այսօր մամուլի ասուլիսին անդրադառնալով ՀՀ-ի և Ադրբեջանի նախագահների՝ Վիեննայում կայացած հանդիպմանը, նշեց, որ այդ հանդիպումից հետո հնչած հայտարարությունները մասամբ էին ականջահաճո:
Նա նշեց, որ համանախագահները մի կողմից Հայաստանին փորձեցին տալ այն, ինչը որպես նախապայման դրվել էր Հայաստանի կողմից`առաջիկա բանակցություններին մասնակցելու համար, մյուս կողմից, որի մասին շատ չխոսվեց երեկ, Ադրբեջանին տալ կամ առնվազն հնչեցնել այնպիսի տեսակետներ, որոնք Ադրբեջանին դուր կգան: «Եթե մի կողմից փորձեցին ասել, որ իրենք կավելացնեն դիտորդական առաքելությունը և մոնիթորինգի մեխանիզմ ստեղծելու հարց դրեցին, որ պետք է կողմերը համաձայնեն դրա շուրջ, ապա մյուս կողմից՝ ՌԴ արտգործնախարար Լավրովի խոսքը փուլային կերպով հարցը լուծելու մասին էր: Սրանից առաջ ամերիկացի համանախագահողի կողմից հաճախ, այսպես ասած, համապարփակ համաձայնագիր պատրաստելու մասին էր ասվում։ Այսինքն`առանց սկզբունքների շուրջ համաձայնության գալու, արդեն սկսվեց պատրաստել այդ համապարփակ պայմանագիրը»,- ասաց նա և նշեց, որ դա Ադրբեջանին դուր գալու փորձ էր:
Բանախոսն այդ փաստը մտահոգիչ համարեց և նշեց, որ Վիեննայում կայացած հանդիպումն ավելի շատ միջնորդների մասնակցությամբ հանդիպում էր, որին մասնակցեցին Հայաստանի և Ադրբեջանի նախագահները: « Բավականին դժվար պետք է լիներ Հայաստանի համար չմասնակցել այդ հանդիպմանը: Մասնակցելուց հետո հայկական կողմի բարձրացրած հարցերը ճիշտ շեշտադրումներով եղել են, բայց մտահոգիչն այն է, թե արդյո՞ք կհարգի Ադրբեջանն այդ մասը: Եվ եթե նույնիսկ հարգեց, ու մենք անցանք բանակցությունների, այդտեղ ևս կան մտահոգիչ հարցեր»,- ասաց նա:
Կիրո Մանոյանը նշեց, որ համանախագահողների հայտարարությունն էլ համահունչ էր ՀՀ Նախագահի ասածներին: «Ադրբեջանի կողմից լռությունը խոսում է այն մասին, որ իրենք այդքան էլ խանդավառ չեն այդ հանդիպմամբ, և համանախագահները փորձում են սիրաշահել Ադրբեջանին և սեղանի շուրջ պահել` փորձելով նաև ասել բաներ, որոնք Ադրբեջանի ցանկություն է, և դա արդեն հաջորդ հանգրվանի խնդիր է, բանակցությունների խնդիր է»,- ասաց նա: