Վերջին օրերին, շփման գծում, Ադրբեջանի նախայարձակ գործողութիւնները մէկ անգամ եւս եկաւ փաստելու, որ Արցախի անկախութիւնը չունի որեւէ այլընտրանք, եւ արցախահայութիւնը չի կարող ապրել ու գոյատեւել ֆաշիստական-ահաբեկչական սկզբունքներով առաջնորդւող այնպիսի պետութեան կազմում՝ ինչպիսին է Ադրբեջանը:
Ադրբեջանական իշխանութիւնների վերջին արկածախնդրութիւնը ի լուր քաղաքակիրթ մարդկութեան, ի ցոյց դրեց մեր տարածաշրջանի փխրուն կայունութեան եւ անվտանգութեան համար վերահաս այն վտանգը, որը ներկայացնում է ալիեւեան կոռումպացւած բռնապետութիւնը:
Բռնապետութիւն, որն իր գոյատեւման պահպանման համար ընդօրինակում է իր աւագ եղբօր՝ Թուրքիայի աւանտիւրական գործելաոճը՝ ռազմաճակատում օգտագործելով անգամ «Իսլամական պետութեան» եւ թուրքական «Գորշ գալեր» ահաբեկչական խմբաւորումների զինեալներին:
Վերը նշւած հանգամանքներից ելնելով, դիմում ենք աշխարհի բոլոր պետութիւններին ու միջազգային կազմակերպութիւններին’ յանուն ազգերի ինքնորոշման հիմնարար իրաւունքի, ճանաչել Արցախի Հանրապետութեան անկախութիւնն ու երաշխաւորել արցախահայութեան ազատ ու անվտանգ ապրելու եւ արարելու մարդկային ամենատարրական իրաւունքը:
Սա միակ ելքն է, որը կը կանխի հարաւկովկասեան տարածաշրջանի կայունութիւնը եւ անվտանգութիւնը սպառնացող պատերազմի վտանգը, եւ կը ստիպի ադրբեջանական իշխանութիւններին յարգելու ԵԱՀԿ-ի Մինսկի խմբի շրջանակներում ընթացող բանակցութիւնների հռչակած սկզբունքները:
ՀՅԴ Թեհրանի Հայ Դատի յանձնախումբն իր ամբողջական զօրակցութիւնն է յայտնում Արցախի Հանրապետութեան իշխանութիւններին ու ժողովրդին, եւ հայոց յաղթական բանակին:
Վստահ ենք, որ հայ ժողովրդին կը յաջողւի միահամուռ ուժերով յաղթահարել նաեւ այս փորձութիւնը:
ՀՅԴ Թեհրանի Հայ Դատի յանձնախումբ
Ապրիլ, 2016 թ.
Յ. Գ. – տեղեկացնում ենք, որ ԼՂ-ի վերջին իրադարձութիւնների կապակցութեամբ ՀՅԴ Թեհրանի Հայ Դատի յանձնախումբը համապատասխան նամակներ է յղել Իրանում հաւատարմագրւած ԵՄ-ի անդամ պետութիւնների, Ռուսաստանի Դաշնութեան եւ Չինաստանի դիւանագիտական ներկայացուցչութիւններին: Յատուկ նամակ է յղւել նաեւ Իրանում Բելոռուսիայի դեսպանութեանը, ուր մեր բողոքն ու վրդովմունքն ենք յայտննել ԼՂ-ի հակամարտութեան վերջին իրադարձութիւնների կապակցութեամբ, այդ երկրի ԱԳՆ-ի տարածած յայտարարութեան կապակցութեամբ: