Դասախօսական երեկոյ «ՀՈՒՍԿ» հաստատութեան կենտրոնատեղիում
«ԱԼԻՔ» – Երէկ՝ փետրւարի 15-ին «ՀՈՒՍԿ» հաստատութեան բարեկամների ընկերակցութեան նախաձեռնութեամբ, նոյն հաստատութեան կենտրոնատեղիում կազմակերպւել էր հերթական դասախօսական երեկոն:
Դասախօսութեան թեմա էր ընտրւած «Սահմանադրական փոփոխութիւնների հնարաւոր ազդեցութիւնը՝ ՀՀ քաղաքական եւ սոցիալ-տնտեսական ոլորտների վրայ». Իսկ դասախօս էր հրաւիրւած «ԱԼԻՔ» օրաթերթի խմբագրութեան անդամ, Հայ Դատի յանձնախմբի նախագահ Արամ Շահնազարեանը:
Դասախօսը նախ անդրադարձաւ Սահմանադրական օրէնքի ընդհանուր բանաձեւմանն ու նշեց, թէ այն ինչ կարեւորութիւն ունի իւրաքանչիւր երկրի քաղաքական-հասարակական կենսագործունէութեան համար, որից յետոյ նա ներկայացրեց Սահմանադրական օրէնքի ընդունման եւ դրա բարեփոխման ընթացքը Հայաստանում՝ վերանկախացումից ի վեր:
Իր ելոյթի երկրորդ բաժնում Արամ Շահնազարեանը հիմնականում ծանրացաւ ՀՀ սահմանադրական բարեփոխումների անհրաժեշտութեան, եւ այն մարտահրաւէրների վրայ, որոնք ստիպեցին ՀՀ իշխանութիւններին նախաձեռնելու այս բարեփոխումները:
Նա կարեւորեց այն հանգամանքը, որ ՀՀ քաղաքական, սոցիալ-տնտեսական առաջընթացն ապահովող այս բարեփոխումների արդիւնաւորման համար անհրաժեշտ է համակարգային որակական փոփոխութիւններ, որոնց առանցքը պէտք է դառնայ մտածողութեան, արժեհամակարգի եւ աշխատաոճի փոփոխութիւնը, ինչը կերաշխաւորի ներքին ու արտաքին բազմաբնոյթ մարտահրաւէրներին համարժէք պատասխանելու կարողականութիւնը:
Դասախօսը յատուկ ընդգծեց, որ այսօր արդէն անհնար է հին գործիքներով, հին մեթոդաբանութեամբ լուծել նոր խնդիրներ, եւ գտնել որեւէ լուրջ հիմնախնդրի արդիւնաւէտ լուծում:
Իր խօսքերի վերջին հատւածում, Արամ Շահնազարեանը ներկայացրեց ՀՀ քաղաքական դաշտում ծաւալւող փոփոխութիւնների եւ ուժերի վերադասաւորման ընթացքն ու նշեց, թէ Հայ Յեղափոխական Դաշնակցութիւնը ինչու է նախաձեռնել իշխող ուժի՝ ՀՀԿ-ի հետ համգործակցութիւն, եւ ինչ նպատակներ է հետապնդում հնարաւոր այդ համագործակցութիւնից:
Նա կարեւորեց այն հանգամանքը, որ ՀՅԴ ողջ կառոյցն ամենայն լրջութեամբ է մօտենում ՀՀ սահմանադրական փոփոխութիւններին ու գիտակցաբար պատասխանատւութիւն է կրում դրան իրագործման եւ արդիւնաւորման համար: