ՀՅԴ Լիբանանի Հայ դատի մարմինը երէկ յայտնի պլոկըր Ալեքսանտր Լափշինը Ազրպէյճանին արտայանձնելու Պիելոռուսիոյ ընդհանուր դատախազութեան որոշումին դէմ դատապարտագիրներ յղեց Սուրիոյ մէջ Պիելոռուսիոյ դեսպանատան, Լիբանանի մէջ ԵԱՀԿ-ի Մինսքի խմբակի համանախագահող երկիրներ Ռուսիոյ, Միացեալ Նահանգներու եւ Ֆրանսայի դեսպաններուն, Լիբանանի մէջ ԵԱՀԿ-ի նախագահող Աւստրիոյ դեսպանին, Լիբանանի մէջ Բրիտանիոյ, Գերմանիոյ եւ Եւրոպական Միութեան դեսպաններուն, ինչպէս նաեւ Լիբանանի մէջ ՄԱԿ-ի ընդհանուր քարտուղարի անձնական ներկայացուցիչին:
Մարմինը իր յղած նամակներուն մէջ խստիւ դատապարտեց Պիելոռուսիոյ ընդհանուր դատախազութեան որդեգրած որոշումը` նշելով, որ երկու բռնապետական երկիրներու միջեւ այս գործառքը խօսքի ազատութեան լպիրշ խախտում մըն է, Լեռնային Ղարաբաղի տագնապի խաղաղ լուծման ջանքերուն վնաս կը պատճառէ եւ Ազրպէյճանը կը խրախուսէ շարունակելու իր անհաւասարակշիռ քայլերը:
ՀՅԴ Լիբանանի Հայ դատի մարմինը դատապարտեց այն իրողութիւնը, որ Պիելոռուսիան դարձած է Ազրպէյճանի հակահայ քաղաքականութեան մէկ գործիքը եւ պիելոռուսական իշխանութիւններէն պահանջեց անյապաղ եւ առանց նախապայմաններու ազատ արձակել Ալեքսանտր Լափշինը:
Աւելի ուշ, Սուրիոյ մէջ Պիելոռուսիոյ հիւպատոսը հեռաձայնեց ՀՅԴ Լիբանանի Հայ դատի մարմինին, որուն մասին տեղեկութիւններ խնդրեց եւ յայտնեց, թէ դատապարտագիրը այդ տեղեկութիւններուն հետ պիտի փոխանցէ իր երկրին արտաքին գործոց նախարարութեան:
ՀՅԴ ԼԻԲԱՆԱՆԻ ՀԱՅ ԴԱՏԻ ՄԱՐՄԻՆ