Ամփոփագիր 20-24 հոկտեմբեր 2020 թ․

20-24 հոկտեմբեր 2020 թ․

ԱՄՆ

Անցնող օրերի ընթացքում Հայ դատի աշխատանքների առումով Ամերիկայում կարևոր ձեռքբերումներ են գրանցվել ինչպես նահանգային, այնպես էլ դաշնային մակարդակում։

ԱՄՆ Կոնգրեսում շրջանառության մեջ են դրվել երկու բանաձևեր, որոնցից մեկը ենթադրում է Ադրբեջանի նկատմամբ պատժամիջոցների կիրառում, այդ թվում զենքի վաճառքի էմբարգո, ամերիկյան օգնության կասեցում, բարձրաստիճան պաշտոնյաների մուտքի սահմանափակում և այլն։ Մյուս բանաձևի նախագիծը ենթադրում է Արցախի Հանրապետության անկախության ճանաչում։ Այս գործընթացներում և առհասարակ շատ ակտիվ են աշխատում կոնգրեսականներ, մեր ժողովրդի մեծ բարեկամներ Ադամ Շիֆը, Ռոբերտ Մենենդեսը, Բռեդ Շերմանը, Ֆրենք Փալոնը, Բրայան Ֆիցպատրիկը, Թոնի Քարդենասը, Դեյվիդ Սիսիլինին, Ջիմ Կոստան, Քաթարինե Քլարկը և ուրիշներ։

Ադրբեջանի նկատմամբ պատժամիջոցներ ապահովող բանաձևի նախագծին միացած կոնգրեսականների թիվը հասնում է 50-ի։

Շուրջ 30 կոնգրեսականներ միացել են Արցախի անկախության ճանաչման բանաձևին։
Այս օրերին ևս մեկ կարևոր ձեռքբերում գրանցվեց Կոնգրեսում, երբ Կոնգրեսի գրադարանի անվանացանկում «հայկական կոտորածներ» բառերը ճշտվել են և փոխարինել «հայկական ցեղասպանություն բառերով»։

ՀՅԴ Հայ դատի Վաշինգտոնի հանձնախումբը պետքարտուղար Պոմպեոյի գրասենյակի նկատմամբ, իրականացրել է հանրային ճնշման գործողություններ, ՀՀ ԱԳ նախարար Զ․ Մնացականյանի հետ հանդիպումից առաջ։ Պետքարտուղարի գրասենյակ են ուղղվել հազարավոր զանգեր և էլ․ նամակներ՝ պահանջելով քննադատել Արցախի և Հայաստանի նկատմամբ ադրբեջանաթուրքական ագրեսիան և ճանաչել Արցախի Հանրապետության անկախությունը։

Կանադա

ՀՅԴ Հայ դատի Կանադայի հանձնախմբից տեղեկանում ենք, որ Կանադայում գործող հայկական կազմակերպությունները նամակով դիմել են վարչապետ Ջ․ Տրյուդոյին՝ պահանջելով ճանաչել Արցախի անկախությունունը և ազատ ապրելու բնակչության անքակտելի իրավունքը։

Հոկտեմբերի 22-ին Արցախի անկախության ճանաչման շուրջ քննարկումներ են սկսվել Կանադայի Օնտարիո նահանգի խորհրդարանում, ինչը զուգորդվել է Թուրքիային ՆԱՏՕ-ից վտարելու պահանջով և ադրբեջանաթուրքական ագրեսիան դատապարտող հայտարարությամբ։

Վերջերս պարզվել էր, որ բացի սենսորային և տեսանկարահանման համակարգերից, թուրքական «Բայրաքթար» անօդաչու թռչող սարքերի շարժիչները ևս կանադական արտադրության են։ Բարձրացված աղմուկից հետո, այդ շարժիչներն արդատդրող «Բոմբարդիեր» ընկերությունը հայտնել է, որ շարժիչների ռազմական կիրառության վերաբերյալ տեղեկատվություն չի ունեցել և կասեցրել է շարժիչների մատակարարումը Թուրքիա։ Հիշեցնենք, որ կանադայում գործում է Թուրքիային ռազմական արտադրանքի վաճառքի էմբարգո։

Արդեն հոկտեմբերի 23-ին, Կանադայի տարբեր հատվածներում տեղի են ունեցել բողոքի հզոր ակցիաներ: Օտտավայից մինչև հեռավոր Կալգարի հայերը դուրս են եկել փողոց իրենց բողոքի ձայնը բարձրացնելու Թուրքիային զենք մատակարարելու առնչությամբ:

Եվրոպա

Հոկտեմբերի 20-ին տարածված հայտարարությամբ՝ Բելգիայի ֆրանսախոս (վալոնական) երկրամասի թվով 32 հասարակական-քաղաքական անվանի գործիչներ կարծիք են հայտնել, որ միջազգային հանրության կողմից Արցախի Հանրապետության անկախության ճանաչումը Արցախի բնակչության ֆիզիկական անվտանգության ապահովման ամենաարդյունավետ ճանապարհն է։ Նրանք նաև կոչ են արել Բելգիային և Եվրոպական Միությանը պարզորոշ մատնանշել Հայաստանի և Արցախի նկատմամբ ադրբեջանաթուրքական ագրեսիան։

Ավստրալիա

Անցնող օրերի ընթացքում ՀՅԴ Հայ դատի Ավստրալիայի հանձնախումբը նույնպես կարևոր հաջողություններ է գրանցել։ Նախ, հոկտեմբերի 21-ին Ռայտի քաղաքային խորհուրդը միաձայնությամբ ընդունեց Հայաստանի և Արցախի վրա ադրբեջանական և թուրքական հարձակումները խստորեն դատապարտող բանաձև։ Այս քաղաքը Արցախի անկախությունը ճանաչել էր դեռևս 2018թ․ին, իսկ 2019թ․ին՝ Ստեփանակերտի հետ ստորագրել բարեկամության համաձայնագիր։

Հաջորդ օրը՝ հոկտեմբերի 22-ին, Արցախի Հանրապետության անկախությունը պաշտոնապես ճանաչող բանաձև է ընդունվել Ավսրալիայի մեծագույն նահանգի՝ Հարավային Ուելսի օրենսդիր մարմնի կողմից՝ ձայների 61-2 հարաբերակցությամբ։

Այս օրերի ընթացքում Արցախիի բնակչությանը և ավստրալիահայությանը համերաշխություն են հայտնել Ավստրալիայի հասարակական-քաղաքական շրջանակների անվանի ներկայացուցիչներ, պատկառելի թվով խորհրդարանականներ։

Հայության շահերի պաշտպանության առումով կարևոր աշխատանքներ են իրականացրել նաև ՀՅԴ Հայ դատի Միջին Արևելքի, ինչպես նաև Հարավային Ամերիկայի հանձնախմբերը։ Դրանք նույնպես ուղեկցվել են բողոքի գործողություններով, տեղեկատվական-քարոզչական և քաղաքական աշխատանքներով։

*Սեպտեմբերի 27-ին Արցախի Հանրապետության նկատմամբ ադրբեջանական ագրեսիայի սանձազերծումից հետո ՀՅԴ Հայ դատի գրասենյակներն ու հանձնախմբերը ամբողջ աշխարհում ձեռնմուխ են եղել Հայաստանի և Արցախի Հանրապետությունների շահերի պաշտպանությանն ու օբյեկտիվ տեղեկատվության ներկայացմանը՝ կիրառելով լոբբիստական համալիր գործիքակազմեր։ Հայ դատի գրասենյակներն ու հանձմախմբերն անընդհատական կապի մեջ են նաև լրագրողական համայնքի ներկայացուցիչների և միջազգային առաջատար լրատվամիջոցների հետ, որպեսզի տեղեկատվահաղորդակցական պայքարում ապահովեն օբյեկտիվ լրատվություն։

ՀՅԴ Բյուրոյի Հայ դատի և քաղաքական հարցերի գրասենյակը մամուլի համար պարբերաբար հրապարակում է ամփոփագրեր, որոնց նպատակն է կենտրոնացված ներկայացնել Հայ դատի համաշխարհային ցանցի կողմից այս օրերին իրականացվող լայնածավալ և բազմաշերտ աշխատանքների առավել ակներև արդյունքները՝ ըստ տարածաշրջանների։